|
Ялти шкулти Тимур команди нумай кĕттермен. В.Морозова инвалид-пенсионерка патне шкул ачисем пырса та çитнĕ. Арманкасси ачисем – А.Борисова, Е.Викторова, Т.Шадрикова, С.Шадрикова, Н.Траншкина, О.Крупина, А.Крупин, Н.Крупин, В.Чернов, С.Галкин, В.Ермолаев ватă кинемее пулăшнă. Вĕсем хуралтă çийĕнчи юра хырса антарнă, картишĕнчине тасатса кăларнă, çырмана туртса кайса тăкнă. Е.Спиридонова пенсионеркăна та çак ĕçсене тума пулăшнă вĕсем. Ачасем икĕ кун хушшинче чупса çÿресе ĕçленĕ. В.Морозова çакăн çинчен шăнкăравласах каларĕ, хăй питĕ савăннине пĕлтерчĕ. Ачасене хаçат урлă тав тума ыйтрĕ. Шкул ачисем касри ватăсене ытти ĕçре те пулăшаççĕ.
Арманкасси ачисем ялта ĕçчен пулнипе палăрса тăраççĕ. Вĕсем çуллахи вăхăтра Ф.Шадриков фермер патĕнче севок анине çум курăкран тасатма, кăларма тата пуçтарма тăтăшах çÿреççĕ. Çапла майпа мĕн ачаран хăйсем валли укçа ĕçлесе илме хăнăхаççĕ.
Тукасри тимуровецсен команди – И.Шадрикова, Ю.Шадрикова, Н.Чуманова, Т.Григорьев, Н.Герасимов, В.Герасимов Н.Орлова ватă çынна пулăшнă.
Ашшĕ-амăшĕ, учительсем, касри çынсем ачасен пархатарлă ĕçĕпе кăмăллă. Пĕччен пурăнакан ватăсене пулăшни вара темрен те паха.
|