15 февраля 2008 г.
Библиотека фончĕсене çĕнетсе пырас, вĕсене çĕнĕ кĕнекесемпе тивĕçтерсе пырас тĕлĕшпе ял тăрăхĕсем хушшинчи тĕп библиотека пĕрремĕш çул мар ĕнтĕ тĕрлĕ мероприятисем ирттерет.
2002 çулта «Хамăр библиотека – хамăр алăпа» девизпа иртнĕ «Ял вулавăшне – кĕнеке парни» ыр кăмăллăх акцийĕ библиотека фондне 979 кĕнекепе пуянлатнă. 2006 çулта йĕркеленĕ «Вулавăша парнелетĕп» ыр кăмăллăх акцийĕ 150 кĕнекепе библиотекăна тивĕçлĕ пулăшу кÿнĕ. Ачасемпе ĕçлекен пайăн кĕнеке фондне пуянлатма декабрĕн 21-мĕшĕнче ирттернĕ «Кĕнекепе пĕрле – Çĕнĕ çула!» фестиваль пулăшнă, Сергей Седовăн 26 кĕнеки библиотекăна парне пулнă.
2007 çулăн пĕтĕмлетĕвĕсем тăрăх, вулакансем парнеленĕ 305 кĕнеке библиотека фондĕнче вырăн тупнă. Çавăн пекех библиотекăпа тачă çыхăну тытакансем Хĕрлĕ Чутай çыравçисен – Галина Зотован, Тамара Шачкован, Николай Черниговăн, Александр Трофимовăн тата Николай Сергеевăн кĕнекисемпе те паллашма пултараççĕ. Петĕр Ялкир, Тамара Шачкова тата Владимир Романов авторсем хăйсен кĕнекисене библиотекăна алă пусса парнеленĕ. Вулакансем парнеленĕ кĕнекесемпе «Ырă ĕç тăвăр – вулавăша кĕнеке парнелĕр» куравра паллашма пулать.
Чăваш Республикин Президенчĕ 2008 çула Ырă ĕçсен çулталăкĕ тесе палăртнă. Çакна шута илсе ял тăрăхĕсем хушшинчи тĕп библиотекăра 2008 çулта «Ырă ĕç тăвăр – вулавăша кĕнеке парнелĕр» ыр кăмăллăх акцийĕ ирттерме тĕллев лартнă. Районти вулавăшсенче «Ырă ĕçсен çулталăкĕ» пуçланчĕ те ĕнтĕ. Акă, Туктамăшри тĕслĕх библиотекăна кăçал вулакансенчен 107 кĕнеке парне пулнă, ачасемпе ĕçлекен библиотека пайне те 20 кĕнеке парнеленĕ.
Акцие хутшăнма кăмăл тăвакансем, библиотекăна кĕнеке парнелесе ыр ĕç тума пултаратăр!
Источник: "Пирěн пурнăç"